Fóðrun gamalla frárennslislagna

Lagnafóðrun er hagkvæm lausn þar eð ekki þarf að brjóta gólf eða grafa upp lóðir. Algengur verktími fyrir einbýlishús er tveir dagar og þann tíma má ekki renna vatn um lagnirnar. Frárennslið er fyrst þrifið með vatni undir háum þrýstingi og síðan ástandsskoðað með myndavélum. Lögnin er því næst fóðruð með grimmsterkum epoxy sokk sem myndar slétta áferð innan í rörinu og er talinn hafa endingartíma á við PVC rör, eða yfir 60 ár. Verkval vill í náinni framtíð bjóða húseigendum á Akureyri og í nærsveitum þjónustu í lagnafóðrun.

Gamlar skólplagnir

Nú er svo komið að fjöldi húsa eru orðin eldri en 50 ára, byggð milli 1950 - 1975 og ástand skólplagna er orðið slæmt. Algengt var að notuð væru steinrör á þessum tíma, en oft voru þó lögð járnrör, svokölluð pottrör undir gólfplötu. Potturinn stendur sig oft betur en steinninn, en þarf sitt viðhald. Steinrörin undir húsinu slitna og afrennsli hitaveitu hefur skaðað þau með sínu sífelda álagi og volgu rennsli. Rörin verða hrjúf og sækja í að stíflast eftir því sem tíminn líður. Steinrör fara iðulega að leka á samskeytum sem getur valdið skólpleka undir gólfi húss og boðið heim rottum, skólpmaur og fleiri lífverum sem við viljum ekki á heimilum. Lagnafóðrun leysir þessi vandamál, því að hvorki rottur, maurar né önnur dýr kæra sig um epoxy plastefnið sem notað er. Rörið verður sem nýtt, nema fáeinum millimetrum þrengra. Á móti kemur slétt áferð sem minnkar rennslismótstöðu og viðloðun alls kyns aðskotahluta svo sem blautþurrka og fitu.

Rótavandamál

Trjárætur eru oft stórt vandamál á lóðum húsa. Rætur geta leitað alllanga leið og rótarkerfið er að jafnaði svipað í þvermáli og hæð trésins. 20 metra há ösp hefur því rótarkerfi sem spannar um 20 metra þvermál. Utanhúslagnir sem eru eldri en 50 ára eru oftast steinlagnir og þær eru ekki þéttar á samskeytum. Rætur trjáa og runna leita inn í lagnirnar og stífla þær að lokum. Við þetta gliðna oft samskeyti röranna og vandamálið verður viðurloðandi. Ef ekki er brunnur á lóðinni þarf oftast að grafa og setja brunn við útrennsli hússins. Eftir að slíkt er gert er svo hægt að skera eða fjarlægja rætur úr lögninni út í götu og þá er ráðlegt að fóðra hana til að fyrirbyggja frekara tjón.